Këshilli i Lartë i Prokurorisë ka pezulluar nga detyra kryeprokurorin e Kukësit, Xhevahir Lita, i cili pak ditë më parë u arrestua në kuadër të një megaoperacionit të zhvilluar nga SPAK.
Po ashtu, KLP ka hapur garën për drejtues në Prokurorinë e Shkallës së Parë të Juridiksionit të Përgjithshëm Kukës.
Deri në zgjedhjen e një drejtuesi të ri, kjo zyrë Prokurorie do të drejtohet nga zv.drejtuesja, Enkeleda Hoxha.
Lita u arrestua në kudër të operacionit të koduar “Metamorfoza” ku në pranga ranë disa persona, mes tyre edhe biznesmeni Pëllumb Gjoka dhe ish- shefi i Drejtorisë së Forcës Operacionale, Oltion Bistri.
Në total, SPAK ka marrë autorizim nga gjykata për 15 arrestime, por vetëm gjashtë persona përfunduan në pranga, ndërsa nëntë të tjerë u shpallën në kërkim.
Njoftimi i KLP
Sot më datë 31.07.2023 Këshilli i Lartë i Prokurorisë, u thirr në mbledhje urgjente nga Kryetari i Këshillit, zoti Balla.
Dy vendimet që u morën sot janë:
1-Pezullimi nga detyra e prokurorit Xhevahir Lita, drejtues në Prokurorinë e Shkallës së Parë të Juridiksionit të Përgjithshëm Kukës.
2-Hapja e garës për drejtues në Prokurorinë e Shkallës së Parë të Juridiksionit të Përgjithshëm Kukës.
Deri në zgjedhjen e një drejtuesi të ri, kjo zyrë Prokurorie do të drejtohet nga zv.drejtuesja, Enkeleda Hoxha.