E diela parashikohet të jetë dita më e ftohtë. Temperaturat pritet të bien deri në -5 gradë celsius në qytetin e Peshkopisë ku shërbimi “Meteoalb” parashikon vlerat më të ulëta të termometrit.
Lagështia në ajër dhe era që do të fryjë e fortë në bregdet dhe me drejtim nga verilindja sipas meteorologëve do të bëjë që i ftohti të ndjehet më tepër.
“Por jo vetëm Peshkopia e gjithë zona verilindore dhe juglindore pritet të jenë në vlera negative nga -2 në – 4 gradë celsius duke bërë që të kemi temperatura tipike dimri. Sa i përket orëve të mesditës edhe aty kemi pas një rënie të ndjeshme të temperaturave të ajrit shkojnë jo më shumë se 12 gradë celsius”, u shpreh meteorologu Akil Osmani.
Rritje e temperaturave parashikohet duke nisur nga dita e hënë. Ajo do të jetë graduale dhe do të kulmojë në mesjavë.
“Parashikohet që mesjava të sjelli temperatura më të larta në vlerën 16 apo 17 gradë celsius në orët e mesditës ndërsa orët e para të mëngjesit parashikohet të kemi temperatura pozitive edhe në zonat malore duke bërë ta kalojnë në 0 apo 1 gradë celsius”, theksoi ai.
Vlerat që po shënon termometri këtë fundjavë sipas meteorologëve janë tipike dimërore.
Ndërkohë të dielën reshjet e borës dhe shiut do të të largohen nga territori duke ia lënë vendin një qielli me intervale vranësirash dhe kthjellimesh.