Aktori që luajti rolin e Sulejmanit të Madhërishëm në serialin super të njohur, dhe që ishte aq bindës saqë edhe privatisht shumë e identifikojnë atë me sundimtarin e madh, është dënuar me burg.
Një gjykatë e Stambollit ka dhënë dënime me burgim me kusht prej mbi një viti për dy aktorë të shquar, Halit Ergenç dhe Riza Kocaoğlu, për dyshimin se kanë dhënë dëshmi të rreme në një rast që lidhet me protestat e Parkut Gezi të vitit 2013, raportoi gazeta Hurriyet Daily News.
Dhjetëra mijëra njerëz demonstruan kundër qeverisë turke të kryeministrit Rexhep Tajip Erdogan në protestat e Parkut Gezi.
Çështja u hap pasi dy aktorët u thirrën nga prokurorët në një tjetër procedurë ligjore që përfshinte agjenten e njohur të talenteve, Ayşe Barım, e cila ndodhet në paraburgim që nga janari me akuzat për përpjekje për të përmbysur qeverinë turke.
Pretendohet se Barim i udhëzoi aktorët që ajo përfaqësonte që të mbështesnin publikisht protestat në Parkun Gezi.
Në vendimin e saj të 23 majit, gjykata e dënoi Ergençin me një vit e 10 muaj burgim, dhe Kocaoğlun me një vit e tetë muaj.
Megjithatë, gjykata e shtyu shpalljen e vendimit, që do të thotë se dënimet nuk do të ekzekutohen nëse aktorët nuk kryejnë një krim tjetër.
Të dy aktorët i mohuan akuzat dhe kërkuan lirim nga akuzat gjatë seancës dëgjimore.
Duke reaguar ndaj vendimit, Ergenç e sfidoi gjykatën, duke pyetur: “Pra, po thoni se gënjeva?”
Pasi i kujtoi gjyqtarit se mund ta apelonin vendimin, Ergenç u përgjigj: “Do ta apelojmë.”
Sipas prokurorisë, Barim mbante lidhje të ngushta me figura kyçe në lëvizjen Gezi në atë kohë, përfshirë biznesmenin Osman Kavala dhe aktorin Memet Ali Alabora.