Stefano Addeo, profesori i gjermanishtes nga Campania, autor i publikimit të një statusi kërcënues ndaj vajzës së Melonit në Facebook ka komentuar për rastin në fjalë.
Ajo që shkrova u krijua me Inteligjencë Artificiale. Tani jam i frikësuar, po marr kërcënime»
«Nuk e shkrova personalisht postimin, por u gjenerua nga Inteligjenca Artificiale. Mendja ime nuk do të kishte mundur të bënte një turp të tillë. I kërkova IA “më dërgoni një mesazh kundër Melonit” dhe ajo më dha atë që unë me zemër të lehtë dhe budallallëk, e publikova. Ishte mbrëmje. Të nesërmen në mëngjes e kuptova se ishte shumë e keqe dhe e hoqa, por ndërkohë dikush e kishte lexuar dhe e kishte ruajtur. Dhe e bëri që të shpëndahej në të gjithë vendin derisa arriti në Romë».
Kështu e përshkruan gabimin e tij Stefano Addeo, i lindur në vitin 1960. Ai jeton në Marigliano dhe jep mësim gjermanisht në një shkollë të mesme në Cicciano, në provincën e Napolit. Postimi të cilit i referohet ishte vetëm disa rreshta i gjatë, një fjali e shkurtër, por e rëndë si një gur i madh: “I uroj vajzës së Melonit të njëjtin fat si vajza nga Afragola”. Referenca e qartë është për Martina Carbonaro, 14-vjeçaren e vrarë me gurë nga ish-i dashuri i saj në zonën e Napolit.
“Kam marrë mesazhe kërcënuese me vdekje. Gjeta domate të ngjitura në portën e shtëpisë sime. Pastaj dola me qenin dhe, pas dhjetë minutash, ata po më ndiqnin, duke më ofenduar me fjalë që nuk guxoj t’i përsëris».
Ai ka mbyllur Facebookun. Në profilin e tij kishte shumë postime kritike ndaj qeverisë, por edhe shumë të dedikuara për kafshët.
“I dua kafshët. Bëj punë vullnetare, shkoj në spitale për të qenë pranë fëmijëve me kancer. Në shkollë fëmijët më duan. Ditët e fundit kam marrë vetëm mesazhe solidariteti prej tyre”.
A keni paraqitur ndonjë ankesë për kërcënimet?
“Jo ende. Jetoj i mbyllur në shtëpi. Bëra një gabim, shqetësimi që po përjetoj për atë që po më ndodh është ende më i vogël se ai që ndiej për publikimin e atij postimi. Sidoqoftë, kam ndërmend ta raportoj”.
A keni frikë?
“Ajo që më shqetëson më shumë është të kërkoj falje nga njerëzit e përfshirë, Meloni, vajza e saj dhe familja e saj. Ishte një postim shumë budalla, i lindur rastësisht, meqenëse sapo kisha dëgjuar në lajme se Italia nuk u shkëput nga lufta në Izrael dhe vazhdoi të dërgonte armë. Unë nuk kam postuar kurrë diçka të tillë».
«Në profilin tim ka postime të tjera, karikatura që i gjej në Instagram dhe që i ndaj, por ato nuk janë karikatura të krijuara nga unë».
Të jesh ironik është një gjë, të kesh një ton kërcënues është diçka shumë ndryshe, apo jo?
«Shkrova “Do të doja”, nuk kërcënova. Nuk thashë se do të vrisja, as se është mirë të vrasësh dikë. Kërcënime të këtij lloji më kanë mbërritur. Megjithatë, jam i shqetësuar për pasojat që historia mund të ketë në një nivel profesional. Më kanë mbetur dy vjet deri në pension, nuk do të doja ta përfundoja karrierën time me një pushim nga puna. Valditara më dukej shumë i zemëruar”.