Presidenti i SHBA-ve, Donald Trump, këmbëngul se vendet bërthamore në Iran u “shkatërruan plotësisht” nga sulmet ushtarake amerikane, pavarësisht një vlerësimi të inteligjencës që hedh dyshime mbi suksesin e tyre.
Detajet e vlerësimit fillestar të dëmit nga Agjencia e Inteligjencës së Mbrojtjes e Pentagonit u zbuluan te partneri amerikan i BBC-së, CBS, dhe media të tjera.
I dërguari special i Trump në Lindjen e Mesme, Steve Witkoff, e quajti rrjedhjen e informacionit “tradhtare”.
Ndërkohë, armëpushimi midis Izraelit dhe Iranit duket se po respektohet, me të dy shtetet që pranojnë se është në fuqi.
Rusia ende nuk ka të dhëna mbi shkallën e dëmit në objektet bërthamore iraniane pas sulmeve amerikane dhe nuk ka gjasa që dikush të ketë informacion realist rreth kësaj, tha zëdhënësi i Kremlinit, Dmitry Peskov.
“Jo, nuk mendoj se dikush ka të dhëna realiste për momentin. Ndoshta është shumë herët. Duhet të presim që të publikohen të dhëna të tilla”, u tha Peskov gazetarëve të cilët pyetën nëse Moska kishte ndonjë informacion mbi shkallën e dëmit në objektet bërthamore iraniane, të cilat Presidenti i SHBA-ve, Donald Trump, i ka shpallur të shkatërruara plotësisht.
Disa nga zyrtarët më të lartë iranianë, përfshirë presidentin e vendit, konfirmuan dje zyrtarisht arritjen e një armëpushimi mes Iranit dhe Izraelit. Megjithatë, figura më e fuqishme në strukturën shtetërore të Iranit, Udhëheqësi Suprem Ayatollah Ali Khamenei, ende nuk ka dhënë asnjë koment publik mbi zhvillimin.
Khamenei, i cili zakonisht jep fjalën përfundimtare në të gjitha çështjet kyçe të shtetit, nuk është shfaqur në publik që prej sulmeve ajrore të Izraelit ndaj Iranit më 13 Qershor. Vëmendja e analistëve, diplomatëve dhe mediave ndërkombëtare është e përqendruar tek ai, në pritje të një reagimi zyrtar.
Sipas raportimeve të pakonfirmuara, Khamenei është larguar nga rezidenca e tij e zakonshme në Teheranin qendror dhe ndodhet në një bunker të sigurt, por këto informacione nuk janë konfirmuar nga autoritetet iraniane.