Kryeministri i Holandës, Mark Rutte ka dhënë dorëheqjen pas divergjencave të mëdha mes katër partive që përbëjnë koalicionin qeverisës. Ngërç politik ka lindur pas palët nuk bien dakord për pranimin e emigrantëve në Holandë.
“Nuk është sekret që partnerët e koalicionit kemi mendime të ndryshme për politikën e emigracionit. Fatkeqësisht më duhet të pohoj se këto dallime janë bërë të pakapërcyeshme. Prandaj, me shkrim, do t’i paraqes mbretit dorëheqjen e të gjithë kabinetit.”
Tensionet arritën kulmin këtë javë, kur Kryeministri Rutte kërkoi mbështetje për një propozim për të kufizuar hyrjen e fëmijëve të refugjatëve të luftës që janë tashmë në Holandë dhe për t’i detyruar familjet të presin të paktën dy vjet përpara se të bashkohen. Ky propozim i fundit shkoi shumë larg për dy parti të koalicionit duke shkaktuar një ngërç.
Koalicioni i Kryeministrit Rutte do të qëndrojë në pushtet si një qeveri e përkohshme derisa të formohet një administratë e re pas zgjedhjeve të reja, një proces, i cili në peizazhin e përçarë politik holandez zakonisht zgjat me muaj.
Holanda tashmë ka një nga politikat më të ashpra të emigracionit në Evropë, por nën presionin e partive të krahut të djathtë, Rutte prej muajsh po përpiqej të kërkonte mënyra për të reduktuar më tej fluksin e azilkërkuesve. Sipas gjasave zgjedhjet e reja do të zhvillohen në Nëntor.