Banorët e tre lagjeve në fshatin Rripë në Gurrë të Bashkisë së Klosit janë pa rrugë automobilistike. Shembja e një masivi dheu ka lënë prej javësh të izoluar totalisht banorët e lagjes “Boza”, ndërsa pa rrugë makine janë edhe dy lagjet e tjera, “Pjetri” e “Alla”. Banorët që jetojnë në këto lagje shprehen se kërkesa e tyre për rrugë ka rënë në vesh të shurdhër, pasi deri tani nuk kanë marrë zgjidhje.
Ata shprehen se çdo material për shtëpitë e tyre i transportojnë me automjet deri në qendër të fshatit Rripë e më pas me kafshë ngarkesë për në shtëpitë e tyre. Vetë banorët e lagjes “Boza” por edhe të lagjeve të tjera, shprehen se për problemet e tyre kanë vënë në dijeni instancat vendore, por që deri tani nuk është marrë zgjidhja e kërkuar. Problematike situata është edhe për fëmijët e shkollës.
Ata dalin nga shtëpitë e tyre me çizme për shkak të baltës dhe i fshehin në mes të rrugës, ku më pas veshin këpucë ose atlete.Ndërkohë, problematike situata mbetet edhe në lagjet “Pjetri” e “Alla”, pasi një konflikt i pazgjidhur ka bërë që të mos hapet rruga, megjithëse është dërguar nga Bashkia Klos një sasi çimentoje10 muaj më parë, por që nuk është përdorur.